Mar 6 | BJR | STEP | Yísufa mi-manaaqána mara fíndifummáseenoo miqóoqari fíndifinoo narí maqúsai Nasareetinní finau, narí faiqi námufaqa miná faqa fiqau.

Mark 6

Yísufa narí maqúsai Nasareeteenní namummáqanau.

(Mataioo 13:53-58; Ruka 4:16-30)

1 Yísufa mi-manaaqána mara fíndifummáseenoo miqóoqari fíndifinoo narí maqúsai Nasareetinní finau, narí faiqi námufaqa miná faqa fiqau. 2 Nasareetee máqusai Yuda máqannaa márunara náriqa amaana Sariríqasaa amaana máqaki kéeqafufanoo Yísufa Ánutuna ufa qímanními márufaqa misá irisée tautúmasee qiqau. Maafá maa-amiqira iriranná yái fee máreenoo fee, yáfee maa-irirána áminoo fee náqimásee faiqí sía áuquaqaa ira ainaina áuqidanoo fee. 3 Maasáki kámundaa máriifa mifá kai máridanoo, miná ánoofa Máriafa máridanoo maaqóoqaraa ánaasee faiqi máridanoo, miná ákaqaafasaauqa Yameesana amaráfa faqa Yooseesa faqa Yudasina amaráfa faqa Simoona amaráfa faqa maaqóoqaraasa márifanoo Yísufa misákinaafa máridanoo. Miná ásooqmaaka faqa maaqóokai máridaqa. Misá minára miqí qímasee níkoo fee qiqau.

4 Yísufa miná iriséenoo maaqí qímasee qímanniminau. Tamummáqara fasiqa moó fannoo máqusa maqúsa fídanoo qímanniminaqa misá iriséeqa miná ufara kúqaa fee qifáranoo narí máqannaasa faqa narí áinaina faqa narí moodáa fasiqa ánaasee faiqi faqa miná ufa síamma írifaranoo. 5 Yísufa narí máqannaasara miqímmidammia foo qímasee sía amana moo fásiqa ánaasee mandáikirausa andeeqánnimaqararee qinau. Qaaramoó aurúsasaa kai ásauku quqásoofaqa fíndifiqau. Narí máqannaasa nári írirana sía minásaa mundúnara irisée firaaqóo taútinau.

Yísufa narí faiqi námu niqiqoofaqa qímannimiqau.

(Mataioo 10:5-15; Ruka 9:1-6)

Yísufa miqóo narí maqúsai Nasareeteendári dínni dínni fíqu fíqumma márusa misá qímannimímarínau. 7 Qímannimiseenoo narí faiqi námu náarama quqáseenoo mandá áfaanna faiqí ánaasee naundurái márusa misá niqiqára afeeka nimiséenoo qaaraqánda qapámandee qaaraqánda qapámandeenoo qímanniminoo qinau, Sía moo áinaina máree fuaqa sáunu̱ kai qara máree fuaqa, féemu faqa uqá faqa munnimma faqa sía máree fuaqa, níku ánaamu afisúmareeqa siuta moodáa afisúmaree sía aabaá moó máraaqa. 10 Ínnee maqúsa maqusa fídaqa moo máqusaki óonu ráifanoo mara quqáinna maaqanaki quqásaina sía namummáqaqa nuaqa minakí kai faiqáida nuaqa, minakíqari moo máqusa fíqa fuaqa. 11 Ínnee moo máqusai fífaqa misá sía ínni mara quqéeqa sía ínni ufa írifaqa ínnee fídaqa kookoomma afaqá nínaamarasee fuaqa. Ínnee miqíqa Ánutuna náruaninnanara misá aaquqímánnimaqéefaranoo. Yísufa miqí qímaseenoo niqiqoofaqa maqúsa maqúsa fídaqa faiqí anaaseera nári mandáinainara nímeesuquaqeera qímannimiqa fiqau. 13 Qímannimidaqa moómoosa naunduráki áfaanna fáafasaaqa márusa niqiqámánnimi márufaqa rafúdamakida fímariqau. Miqíqa fídaqa aurúsa níkiaaqa sáuna fadameenara fooqáana adíasoofaqa fíndifi máriqau.

Eeroodeefa Yoohanee nammári nímimaruna ákiqa tuqínau.

(Mataioo 14:1-12; Ruka 9:7-9)

14 Yísuna áufakiana ufa fannoo aiqáma atinai dáraanimámbunara Eeroodeefa mi-ufána faqa iriséenoo taútinau. Akaqáusa Yísunara Yoohaneefa nammári nímimarufa kúqiranakiqari fíndifinoo firaa ainaina áuqeemarí fee qufaqa akaqáusa Yísunara Eeriaafa óoqeenaa tamummaqara fasiqa mifá kaifáa kambíqanoo máridanoo fee qufaqa akaqáusa óoqeenaa tamummaqara fásiqa fooqáafa kambíqanoo máridanoo fée qiqau.

16 Eeroodeefa mi-ufáusa iriseenoo narí qinau, Qinée óoqai Yoohaneena nammári nímimaruna anuka ateekásaafanafa mifá kai kúqiranakiqari ánida qinoo.

17 Óoqai Eeroodeefa narí kai qímannimufaqa sundíauqa Yoohaneena nammári nímimaruna rumbámaree karabúsa máaqaki quqáseeqa firaa sáinanda qumáreeqa rumbá quqásoofanoo márinau. Eeroodeefa sía fífau Yoohaneena maréeqee rumbáranaki quqánau. 18 Yoohaneefa nammári nímimarufa maqee maqee ánaasee qúmmuarunasaara áqunara rumbá quqánau. Eeroodeefa narí ákaqa Firipina ánaaqa Eeroodia námmarina káqi narí afaaqi faqa márufanoo qúmmuarunara Yoohaneefa qímaminoo qinau Anée aneenná ákaqa ánaaqa Eeroodia námmarina qúmmuaramminana máraananoo Ánutuna ufa rukíasee miqíananoo. 19 Eeroodia námmarifa Yoohaneena ufa irisoofanoo afaaqaí káqi ati qanóo márufanoo máridanoo miná áriranara randée márufanoo Eeroodeefa qáoo qufanoo sía árinau. 20 Eeroodeefa Yoohaneenara írirana andeeqára qikairi síai fasiqa fee qímasee minára rufíaseenoo karafúsaki séenoo ititásoofanoo sía Eeroodia námmarifa árinau. Eeroodeefa maqee maqee Yoohaneena faqa ufa qíranara áidi márufanoo maqee maqee Yoohaneena áaramasee ufa qímamimarinau. Yoohaneena ufa fannoo Eeroodeefa maqee maqee Yoohaneena faqa ufa qufanoo Yoohaneena ufa fannoo Eeroodeena raqúrámufanoo áqu ufafa afaaqaí ati qanóo marúnara síamma írimarinau káqi maqee maqee Yoohaneena karabúsaki márunna áaramasaida ufa narí qímami narí qímami qímariqau.

21 Dóo ánaasee Eeroodia námmarifa rakísinoo fífiufanoo áruaninna faasaana paqúrinau. Mi-fasaanná faiqí Eeroodeefa Eeroodia námmarina afaaqi narí ánoofa narí maqóo faasaannara iriseenoo qoomáqa firaaná suqáseeno kaamánna úriqararausa faqa sundíauqa úriqararausa faqa Kariree máqa maaqaki faiqí firaasá faqa náaramasoofaqa aniréeqa née maríqau.

22 Misá née márufanoo ánaasee Eeroodia námmarina áraamuna fannoo aniréenoo misá nóorinni idí ámiqirana ráidanoo aqoori ráqee marínau. Aqoori ráqee marufaqa misá írufanoo adíafaa qufanoo Eeroodeefa qoomáqa nímiufa mi-manaaqána áaramásee aiqámausa nífusaa qímaminau, aní ámiqira idi akiaqara nána ainainee qínaqee ámianauree qinau. Sía kai ufa kái qinau narí amana náaree aqiqámáseenoo qímaminau, Anée nána ainainarée áididanoo fee anée qínaqa mi-ainainná aní ámianaura. Anée Kariree máqa maaqa dínni rakísianee qínaqa qinée qámbaana óosusee dínni aní ámianana anée misásaa rakísia qufanoo narí ánoofinai óonureenoo qinau, nánaree qímamianauree qufanóo miná ánoofa maqee Yoohaneefa nammári ními marífa kúquanifee qímasee Eeroodeenara qíkaru qíandoo qímaseenoo ákiaqa tupúmma maree mínisaifaqa qeeqá qifunnoo miná qáfamasee kúqaa kúqiifoo qianáuree qímasee narí áraamuna qímaminau. Yoohaneefa nammári nímimarina miná anuka ateeká maree miná ákiaqa míni qímiaqeera kai qía qufanoo miná áraamuna fannoo anirandéenoo sandée óonureenoo Eeroodeena qímaminoo afeekaikámándee qímaminau anée maqee uqanna Yoohaneefa nammári nímimarina anuka tuqúsee fidíka máaqamau íandoora qímasee saqári difaaniki ákiaqa quqásee míni qímiannee qufanoo Eeroodeefa firaaqóo uqanna ákooqamáfinau. 26 Ákooqoofanoo sía amana qáoo qinau. Aiqámausa nífusaa narí amana aqiqámásoonara asaurúseenoo narí sundía moó áqiqoofanoo karafúsa márunaki óonureenoo Yoohaneena anuka ateekáseenoo saqári difaaniki miná ákiaqa quqáseenoo máree míni Eeroodia námmarina áraamuna ámufanoo mifá maréeqeenoo narí ánoona áminau.

29 Yoohaneefa nammári nímimaruna faiqi námu mifá kúqunara irisée ani miná irí máree múnu ákundaqau.

Yísufa féemu namufaqa noodáanna faqa nímufa.

(Mataioo 14:13-21; Ruka 9:10-17; Yoohanee 6:1-14)

30 Yísufa narí faiqi námu niqiqoofaqa maqúsa maqúsa nídaqa qímannimunara faqa áuqoonara faqa Yísuna míni qímamiqau. 31 Qímamimarúfaqa faiqí ánaasee moómoosa anirée qumbíqafunara nárana nárafa sía amanaíkufanoo Yísufa narí faiqi námu maaqí qímasee qímanniminau. Ániaqa ínnisaimbaqa faiqí sía máriannai óonuree idooáaqa. Miqí qímaseenoo narí faiqi námufaqa nammári áfainni óoquree kanúqaki akarámafufaqa nammári ámuaqumau fiqau.

33 Faiqí ánaasee moómoosa níndafamáseeqa óo Yísufammi foo qímasee nári maqúsaki nári maqúsakiqari óonu maree ani máreeufaqa Yísuna kanúqa fannoo múnu maqánamu raqúru ámufanoo níndafoofaqa faiqí ánaasee moómoosa fáasai áfainni qúsi maríqau. 34 Yísufa kanúqakiqari maqásaa áqufinoo faiqí ánaasee moómoo níndafamásoofanoo firaaqóo ámuqusufanoo qinau. Óo maaqóo máriasa sipsípa aandaurafoora rakísirafa síaisa máriafanoo fee qímaseenoo Ánutuna ufa óosana óosana ainainara qímanniminau. 35 Eenóofaqa Yísuna faiqi námu Yísuna qímamiqau, dóo eendídanoo anée niqiqáinaqa káqikaa maqusakiaqa nárana feefauríaqa maaqóo faiqí síaiqoo máridanoo fee qufanoo Yísufa qinau ínneeqá kai nárana nímiaqa qufaqa misá qiqau, maasá sía amanaíkianaura maasá moómoo óoni máreeqa óonu moómoo féemu feefaurúmasee mínisee nímianaqa náifanoo sía amanaikíannoo, maasá sía amanaikídaqa qufanoo Yísufa qinau. Ínni féemu náqummee máridanoo óonu qáfaaqa qufaqa misá óonu qáfamaseeqa anirée qímamiqau, maasá féemu moodáanai qísaukunamu, noodáanna qaaraqánda faqa máridanoo fée qufanoo

39 Yísufa qímanniminoo qinau. Ínnee faiqí ánaaseera qífaqa misá rainá rainámáfinaqa náadu náadu ruúmbaku fínaqa qúsau̱ rasoonóokamasee óoqumari máree fuaqa qufaqa faiqí ánaasee eedóo qímasee ruúmbakiranakiqari padímambufaqa óoqu marifiqau. Akaqá ruúmbakiranakiqari wan handareeta máriqau akaqá ruúmbakiranakiqari qaara fasiqa níku nísauku taikásee qísaukuqara taikásee fasiqa ánaasee máriqau. 41 Óoqu marifufanoo Yísufa mi-moodaannai qisauku feemúna qumáree noodáannaqara faqa qumáree sandáaqai óori uqéerasee Ánutunara dúfi dúfi qímaseenoo mi-feemúna ruqí ruqí mándeenoo narí faiqi námu nísaukuki quqásoofaqa faiqí ánaasee óoqu máriranakiaqa nimi máree fímariqau. Yísufa miqíkai ínoo noodáanna faqa ruqí ruqí mánnimufaqa miná faqa nimi máree fufaqa noofanoo nímuaqufaqa akaqána káqi quqáqau. 43 Yísuna faiqi námu miná átaraasa qumáree qísaukuqara taikásee qíkunni óoqu qaara marasée uqá qumbiqáqau. 44 Mi-naranná née marúsa faifa tauséenna fasiqa máriqau, ánaasee faqa faiqiuqáindi faqa máriqau. Óoni saqári áuqusee moómoo uqanna máriunara faifa tauséenna fee qínoo máridanoo.

Yísufa nammári ámuaqumau finau.

(Mataioo 14:22-23; Yoohanee 6:15-21)

45 Yísuna faiqi námu nárana átaraasa mara mároofanoo Yísufa narí faiqi námuara afeekaikámándee fuki faakí qínoo niqiqoofaqa misá miná áfunni kanúqaki akarámafi Beetasaida máqusai nammári dínni afainni fiqau. 46 Misá fímarufanoo Yísufa faiqí ánaasee niqiqámásoofaqa fufanoo mifá narí faiqi námu nímanda máseenoo naríaraa ámuaqunamusaa óoru máridanoo Ánutunara innaaru qímarinau.

47 Eendúfanoo Yísuna faiqi námu kanúqaki nammári qámbaanai nímarufanoo Yísufa naríaraa maqásaa máridanoo misá níndafoofanoo úfai fannoo misá nóorindari ánidanoo kanúqa mara fúrufarimarufaqa púrannai púridaqa kadáapindi maríqau. Ínaaqiana kookooráana ufaqí marú kamuqoo Yísufa misúnnai fídanoo nammári ámuaqumau áiku rámasee finau. Mifá kanúqakinaasa fínnaaqaréera foora fímarufaqa Yísuna faiqi námu áfaanna fee qímasee rufíasee fáaqariqau. 50 Misá fáaqarumasoofanoo Yísufa qímanniminoo qinau. Sía mapáraa iaqa nifaaqa quqásee kásooiaqa qinéemma ánidaqa. Yísufa miqí qímaseenoo misá faqa kanúqaki akarámafufanoo misáki óoqumari fufanoo úfai fannoo taikáfinau. Taikáfufaqa Yísuna faiqi námu mapáraa íqa naundurá faqa fúrufariqau. 52 Yísufa moodáanai qísauku féemu ruqí ruqí mándee nímufaqa noofanoo amanaíkunara miná faiqi námu sía miná ánoonara andeeqásee írusa máridaqa nammári ámuaqumau ánunara faqa sia íriqau.

Yísufa Keeneesareeta máqusanaasa aurírana taikánnisanau.

(Mataioo 14:34-36)

53 Misá miqóoqari kanúqaki nammári ámuaqumau fíqa munu maqá raqúrámufaqa fítaqá maréeqa máfi kanúqa qusúseeqa dóo Keeneesareeta máqa maaqammifoo qímaseeqa kanúqakiqari áqufiqa maqásaa óorufufaqa misaqá márusa miqóoqaraasa Yísufammifoo qímaseeqa sandéeqa máqusa maqusa qímannimufaqa náriqa aurímarusa qaarísa rumbá máraidaqa yátinnai fee Yísufa fúannoo fee qímasaida aurímariasa qaarísaa rumbá máraidaqa Yísuna óorinni míni quqée maríqau.

56 Yísufa yá maqusanai fee yá táunnaki fee yá aináini marúnaki fee finau nári aurímarusa nífiqa máraidaqa mifá funnái múnu makéetaki firaa saqa márunaki quqásee Yísunara nári nímuqusa óokiqari firaaqóo qímamiqau. Maasá sía kadáapi ámirara qímamidaqa aurímariasa aní qamunna áti kai áuqamásaida fíndififara qídaqee qufanoo Yísufa eedóo qufaqa miná qamunna áuqee marúsa ámiqi mándee fíndifi maríqau.